SAWALA KELOMPOK

SAWALA KELOMPOK

A.    Unsur-Unsur dina Sawala Kelompok  

                  Dina sawala kelompok biasana sok diwangun struktur organisasi panyaturna, aya ketua, moderator (panumbu catur), jeung notulis/notulén.

1)      Ketua

             Lumangsungna sawala ditangtukeun ku kaparigelan ketua, ku kituna etua miboga tugas nu kudu diperhatikeun nya éta :

·         Tatahar sakur anu diperlukeun dina sawala

·         Ngumumkeun topik atawa judul masalah jeung tujuan sawala

·         Netepkeun / nyadikeun waktu pikeun sagala kagiatan sawala

·         Ngatur jeung ngajaga lumangsungna sawala nepi ka réngsé

·         Ngajaga minat jeung karep pamilon sangkan tetep sumanget

2)      Pamilon atawa partisipan

             Aya sababaraha hal anu kudu di perhatikeun ku pamilon ogé diantarana :

·         Milu andil kana lumangsungna sawala

·         Teu nyarita saméméh dititah ku pingpinan sawala

·         Nyarita kalawan teges (nanya, ngoméntar) tur ngayayay

·         Nepikeun eusi caritaan ku fakta atawa data nu ngarojong kana eusi sawala

·         Daria salila lumangsungna sawala

·         Ngaregepkeun kalawan pinuh ku perhatian

·         Ngajaga sopan santun

·         Surti kana pamadegan batur

           

B.     Bangbaluh jeung Cara Ngungkulanana dina Kagiatan Sawala

                   Sababaraha bangbaluh dina kagiatan saala diantarana:

Ø  Gagal maham masalah

Ø  Keukeuh kana pamadegan pribadi

Ø  Gagal ngabédakeun antara fakta jeung nu aya jeung pamikiran nu sawala

Ø  Nyarita pikeun kapentingan pribadi

Ø  Béda pamadegan lantaran béda sudut pandang jeung argument

Ø  Ngagunakeun kekecapan anu ngondang réaksi jeung konotasi séjén nu ngabalukarkeun patumpukna pamikiran

                                   

                                    Sacara umum pikeun ngungkulanna nya éta :

v  Ngarahkeun panitén kana sagemblengna eusi sawala

v  Nyarankeun sangkan sawala teu méngpar tina tujuan utama

v  Museurkeun konséntrasi ikiran kana maslah nu hésé dipatotoskeun

v  Mahing loba teuing nyarita

v  Nanyakeun sumber-sumber informasi atawa argumen

C.    Kritéria Anu Jadi Ukuran Tina Sawala

1)      Patalina jeung topik anu disawalakeun,saperti :

·         maham henteuna masalah

·         titén henteuna kana padungdengan

·         lancar atawa ngayayay

·         aya henteuna bukti atawa fakta anu ngarojong

·         kekecapan anu digunakeun umum atawa husus

·         putusan pribadi atawa kelompok

2)      patalina jeung tehnik anu digunakeun dina sawala, saperti :

·         nyarita sanggeus batur cacarita

·         nyarita saperluna

·         ngoméntaran dumasar data jeung fakta

·         nafsirkeun pamadegan kalawan objéktif

·         rasional teu émosional

D.    Rupa-Rupa Sawala Kelompok

1.      Diskusi Panel

            Mangrupa salah sahiji kagiatan sawala anu diwangun ku sababraha urang panelis salaku narasumberna. Kaonjoyan dina diskusi panel nya éta :

a.       Materi leuwih jembar sabab di pedar tina sababarah jihat

b.      Para panelis salaku ahli dina widangna

c.       Katara aya pro jeung kontra ti para pamilonna

d.      Kawangun sistem bantahan, koméntar, jeung gugatan nu kuat

e.       Kabébasan dina nepikeun sawangan

     

Sedengkeun kahéngkéranna nya éta :

a.       Pamilon jadi asa-asa dina nepikeun sawangan

b.      Modétrator kudu bisa nyieun kacindekan sorangan

c.       Kudu bener-bener milih modérator anu dianggap mampuh dina masalah anu dipedar

d.      Sok aya nu kasigeung lantaran kadésah pamadegan

e.       Dibutuhkeun panélis anu satata.

2.      Brainstorming

            Mangrupa salah sahiji metodeu sumbang saran dina raraga meunangkeun gagasan,pamadegan,informasi,pangaweruh,pangalaman ti para pamilon anu kalibet dina éta sawala. Mimiti dipikawanoh ti mangsa perang dunya ka II, dialpukahan ku Osborn. Sawala wangun brainstorming miboga sababaraha modél diantarana :

1)      Verbal barinstorming,

2)      Nominal brainstorming

3)      Elektrinical brainstorming

      Kaonjoyan brainstorming nya éta :

a)      Ngalatih mikir gancang tur logis

b)      Ngaronjatkeun karep pamilon sangkan siap ngébréhkeun sawangan jeung pamadeganna

c)      Numuwuhkeun kaayaan démokratis jeung disiplin

d)     Ngaronjatkeun partisipan pamilon

      Sedengkeun kahéngkéranna nya éta :

a)      Pamilon teu turut kana aturan

b)      Notulén ngarobah ide anu diébréhkeun ku pamilon

c)      Pamilon teu mampuh nengetan masalah tina sababaraha puseur panitén

d)     Aya prasaan sieun salah, kurang antusias, sarta kurangna gawé bareng antar pamilon.

3.       Debat

            Debat mangrupa kagiatan adu argumétasi antara dua pihak atawa leuwih pikeun nyawalakeun jeung mutuskeun masalah jeung bédana pamadegan. Dina kamus basa sunda R.A Danadibrata (2006:163) ditétélakeun yén kecap debat nya éta sawala sok disebut ogé ngadebat, maduaan ; silih debat hartina adu rényom. Sedengkeun dina KUBS (1980), kecap debat nya éta paadu, parebut bebeneran ku carita, ngébréhkeun pamadegan,pamanggih, atawa tungtungna tina sarupaning perkara supaya bisa netepkeun kumaha pihadéeunana.

            Tina sawatara pamadegan diluhur bisa ditétélakeun yén ngaliwatan sawala debat saéstuna mah mangrupa tarékah pikeun ngadéwasakeun dina cara mikir jeung nyanghareupan ayana béda pamadegan. Ku cara debat bisa maluruh jalan kaluarna hiji masalah

4.      Simposium

            Mangrupa sawala anu dijejeran ku sababraha urang ahli pikeun nepikeun biantara ngeunaan rupa-rupa jejer caritaan dina hiji tema, sarta nu lilana diwatesan, upamana 5-15 menit. Ieu sawala diwangun ku pamingpin sawala, ahli jeung pamilon.

            Dina kamus basa sunda R.A Danadibrata ditétélakeun yén kecap symposium ngandung harti musyawarah pikeun nyodorkeun papahaman, kayakinan ngeunaan hiji objék atawa masalah. Dina syimposium henteu ngahasilkeun hiji kaputusan, tapi ngan meunang gambaran paham nu benang ngabanding-banding ti ahlina nu nyodorkeun papahaman, kayakinan téa. Sarta biasana dina interaksi antara para ahli jeung pamilon teu pati karep.

5.      Kolokium

            Mangrupa salah sahiji jenis sawala anu tujuan pikeun ngaréngsékeun rupa-rupa pasualan nu aya dina hiji jejer anu jolna ti pamilon atawa paregep. Para ahli teu nepikeun  biantara tapi narima jeung ngajawab pananya ti para pamilon ngeunaan jejer anu geus ditangtukeun dina ieu sawala, interaksi antara para ahli jeung pamilon kacida karepna

6.      Fishbowl

            Mangrupa sawala anu diwangun ku sababaraha urang peserta nu dipingpin ku hiji ketua pikeun néangan hiji kaputusan. Kecap fishbowl ngandung harti wadah lauk. Wangun sawala model kieu kaasup salah sahiji metodeu pikeun nerapkeun pembelajaran kooperatif. Padungdengan dina sawala fishbowl lumangsung sacara rasional jeung émosional. Tema anu dipadungdengkeun upamana waé perkara undak usuk basa di kalangan masarakat sunda . ieu matéri dipedar ku sababaraha ahli dina widang basa, kalayan dibandungan ku paregep (bisa mahasiswa atawa masarakat umum).

7.      Sidang

            Sidang mangrupa hiji riungan dina raraga ngarumasakeun hiji perkara pikeun ngahontal mupakat. Nilik kana kapentingan jeung masalahna, sidang ngawengku sababaraha rupa diantarana aya nu disebut sidang pleno, sidang komisi, sidang kabinet, sidang paripurna, sidang luar biasa, sidang pangadilan, jeung ujian sidang.

            Salah sahiji rupa sidang nya éta sidang pléno, mangrupa sidang anu dihadiran ku para anggota anu ditunjuk jadi wawakil atawa delegasi ti unggal-unggal kelompok, daerah, organisasi, atawa partey. Iu sidang sok disebut ogé sidang paripurna.

8.      Buzz Group

            Buzz Group asalna tina basa Inggris, nya éta kecap “buzz” jeung “Group”. “buzz” hartina ngahiung (dengung) “group” hartina “Kelompok”. Jadi bisa disebutkeun yén buzz group téh nya éta kelompok nu ngahiung. Pédah salila lumangsung diskusi aya sora ribut kawas éngang nu ngahiung.

            Buzz group kaasup kana sawala kelompok leutik minangka salah sahiji cara anu di paké pikeun ngungkulan pasualan-pasualan nilik sababaraha aspék jeung dilakukeun ku cara silih tuker pikiran sacara sistematis, nu diwangun ku sababaraha kelompok ahli pikeun ngaréngsékeun hiji masalah. Metodeu anu dipaké dina ieu sawala nya éta problem solving. Ieu sawala lumangsung dina waktu anu singget pikeun nyawalakeun hiji pasualan, sarta néangan bongbolonganna.

9.      Policy making group

            Mangrupa wangun sawala anu tujuanana pikeun nangtukeun kawijakan anu diwangun ku pamilon saperti (ahli, akademisi, politikus, jsté). Dina ngaréngsékeun hiji masalah atawa nangtukeun hiji kaputusan didasaran ku hasil pangamatannana. Para pamilon policy making group ngayakeun padungdengan sacara rasional. Téma anu dipadundengkeun dipedar ku sababaraha urang ahlina kalayan dibandungan ku para paregep (bisa waé mahasiswa atawa masarakat umum).

10.  Roll play

            Mangrupa hiji kagiatan nyarita anu dirojong ku hiji skenario. Dina roll play teu ukur ngandeulkeun mahér nyarita, tapi ogé dibantu ku gerak peraga séjénna, kayaning latar tempat jeung suasana nyarita. Roll play bisa lumangsung dina hiji rohangan anu di tata husus atawa di alam bébas. Matéri anu dipedar dina sawala model kieu biasana nu raket jeung kagiatan kelompok gawé kayaning cara ngajar, cara tani, cara masak, déklamasi, téater, jsb.